Lenten Reflection: Comfort Zones and Security Blankets

Lahat tayo ay may comfort zones at security blankets, mga bagay na nagpapanatag at nagpapakalma sa atin. Para sa ilan, maaaring madaling mahalata ang mga ito tulad ng mga gabay na nakasulat kapag nagsasalita. Iyong iba ay maaaring mas tago gaya ng mga lucky charm na nasa bulsa. Marahil mayroon ding iyong mga pinupuntahan natin kapag naghahanap tayong kapanatagan. Sa parehong paraan, mayroon din tayong mga hangganan na hindi natin nilalampasan sapagkat maaari tayong makadama ng pagkaligaw o pagkabalisa. Tunay na may gamit ang mga ganitong security blankets at comfort zones.

Pinapaalala nitong Panahon ng Kuwaresma ang isa pang ganitong nagkakaloob ng katiyakan at kaligtasan: ang krus. Marahil hindi ito katulad ng iba pa subalit naghahandog ito ng ginhawa at katiwasayan na kailangan natin, lampas pa sa anumang maaari nating hangarin o harayain. Sa salaysay nito, ipinapakita ng krus na mayroong nangangalaga sa atin, hindi lamang sa salita kung hindi sa tunay na pagsasakatuparan ng pangakong kaligtasan. Isang simbolo ng pag-ibig, itinatampok nito Siya na nanindigan para sa atin sa buhay at kamatayan. Bilang paanyaya sa walang hanggan, itinutulak at nilalampasan nito ang mga hangganan ng kasalanan, at ipinapakitang mayroon pang higit at mas mainam.

Kapag tinitingnan mo ang krus, ano ang iyong nakikita at nadarama? Paano mo ito at ang nakapakong Hesus hahayaang magkaloob sa iyo ng kaginhawahan at katiyakan? Sa bahaging ito ng iyong buhay, ano ang kapanatagang kinakailangan mo mula sa Kanya? Tugma sa pamamaraan ng Diyos, ang krus ay tahimik, payak at hindi mapilit. Subalit naroon ang lihim, mahika at kapangyarihan nito – isinasalamin nito nang walang paghahambog ang katapatan at sigasig ng Panginoon na manatili sa atin, na umantabay sa ating paglalakbay, at pahalagahan tayo.