Lenten Reflection: Dirt, Debt, Death

May mga salitang lantarang sumasalamin sa mga bagay na hindi natin kadalasang ninanais. Marami nang naibentang produkto upang makamit natin ang kalinisan sapagkat ayaw natin ng dumi sa ating mga tahanan, damit at maging isip. Isang mahalagang bahagi ng pamumuhay ang usaping pinansyal at naglalayon tayong lumayo sa utang dahil kapag mayroon tayo nito, tila hindi maalwan ang ating kalagayan. At ang kamatayan, bagaman hindi maiiwasan, ay isang paksang karaniwang masakit pag-usapan at maranasan, at nagdudulot ng pagkaligalig, pighati, o maging pangamba.

Umiiwas tayo sa tatlong ito subalit walang iba kung hindi ang ating Diyos ang humarap sa bawat isa sa mga ito para sa ating kapakanan. Sa Kanyang pagdurusang pisikal at sa pagbagsak Niya sa lupa mula sa pagbubuhat ng krus, pinaigting ng dumi ang pasakit sa Kanya sa pinakamahihirap na sandali. Naging realidad din Niya ang utang sapagkat Siya ang nagbayad upang palayain tayo sa dulot na karimlan ng kasalanan. At tigib sa dalamhati, dusa at dalita ang mga huling oras Niya na nauwi sa kamatayan at naging sukdulan Niyang sakripisyo. Itong tatlong karanasan ay mga pantaong posibilidad, realidad, na hinayaan ng ating mapagmahal na Panginoon na danasin Niya.

Hindi natin kailanman mababatid ang laman ng puso ng ating Tagapaglikha kung hindi natin titingnan kung paano Niyang tiniis itong mga mapait na karanasang kinaharap Niya dahil sa atin, para sa atin, mula sa atin. At sa pamamagitan lamang ng Kanyang kabutihan at pagkakaloob kung kaya makasusumpong tayo ng pag-asa at pagliligtas kahit pa sa pinakapangit, pinaka-kasuklam-suklam at pinakamapait na mga bagay gaya ng mga ito. Ngayong mga araw ng Kuwaresma, hayaan natin ang sariling maalala na walang kasamaan, walang kalunus-lunos, walang kapaitan ang kailanman magiging mas makapangyarihan sa Kanya na Bukal ng lahat ng mabuti, tunay at marilag. At nawa tumingin tayo sa ating kalooban at magtanong: anong dumi, pagkakautang at kamatayan ang nararanasan ko sa literal at matalinghagang paraan na ipinagdarasal kong pagpanibaguhin ng Diyos? Marumi, lubog sa utang at namamatay man tayo sa anumang nakapipilipit na kahulugan ng mga ito, pinagdaanan na ni Hesus ang lahat ng iyon at Kanyang napagtagumpayan, at hangad Niyang ibahagi sa atin ang paraisong Kanyang tahanan.